إستضافة الحوت السوري

الإشتراك في سيرفر الحوت السوري المجاني باقات لن يحلم بها احد على كروت اصلية وسيرفر يتحدى العالم


الانتقال للخلف   منتديات الحوت السوري : عام شامل تقني > :: القسم الإسلامي :: > منتدى شهر رمضان المبارك

إضافة رد
 
أدوات الموضوع انواع عرض الموضوع
رقم المشاركة : ( 1 )
 
ندى على
مراقبة
ندى على غير متواجد حالياً
 
  • رقم العضوية : 95
  • تاريخ التسجيل : Dec 2008
  • مكان الإقامة :
  • عدد المشاركات : 1,262
  • عدد النقاط : 100
  • قوة التقييم : ندى على will become famous soon enoughندى على will become famous soon enough

كُتب : [ 08-12-2010 ]


أسرة منتدانا الجميل كل عام وانتم بخير وسعادة حبايبى

بداية بعتذر عن طرح الموضوع هنا فى الواحة الرمضانية


لكن انا طرحته هنا علشان يستفيد بيه أكبر عدد ممكن من الأعضاء

لاننا وكالعادة دايما كل يوم نفكر هنعمل ايه بكرا ؟؟

حبيت انى اطرح عليكم أفكار لوجبات متكاملة تشمل العصاير والحلويات

والسلاطات والطبق الأساسى تيسيرا على ست البيت

فكل يوم باذن الله هطرح فكرة لعزومة ... تابعونى

ورمضان كريم









رد مع اقتباس
 
 رقم المشاركة : ( 2 )
ندى على
مراقبة
رقم العضوية : 95
تاريخ التسجيل : Dec 2008
مكان الإقامة :
عدد المشاركات : 1,262
عدد النقاط : 100

ندى على غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-12-2010 ]


عزومة 1 رمضان






عصير قمر الدين






بما أننا اخترنا أن يكون معانا في الأسبوع الأول من رمضان أكلات من المطبخ المصري، يبقى هتلاقي إن أهم حاجة بتميز السفرة المصرية في رمضان هو؛ وجود كاسات عصير قمر الدين على السفرة، ودي أبسط طريقة لعمل العصير..





المقادير:



1/2 لفة قمر الدين مقطعة قطعاً صغيرة

1/2 كوب مشمش مجفف
1/2 كوب سكر
3 أكواب مية

مكعبات ثلج "اختياري"


الطريقة:



انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كاسات العصير وضيفي إليه مكعبات الثلج.





***************







شوربة الخضار بالشعرية






على فكرة الطبق ده طعمه حلو جداً، وكمان خفيف على المعدة في رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل اللي ممكن يفقدها بسبب الصيام، ودي أسهل طريقة لعمل شوربة الخضار...





المقادير:



1/4 كيلو بسلة

1/4 كيلو فاصوليا خضراء
2 حبة جزر مقطعة مكعبات متوسطة الحجم
2 حبة بطاطس مقطعة مكعبات متوسطة الحجم
2 حبة كوسا مقطعة مكعبات متوسطة الحجم
1/2 كوب شعرية
معلقتين سمنة
ملح وفلفل
شوربة فراخ أو لحمة
مكعب مرقة دجاج "اختياري"
حزمة بقدونس مقطعة قطع صغيرة "للتجميل"

عصير ليمونة "اختياري"


الطريقة:



1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة.





2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي.





3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم مكعب مرقة الدجاج وشوربة الفراخ أو اللحمة وسيبيهم على النار لمدة ربع ساعة أو لغاية ما الشوربة تغلي، بعد كده هدي النار وسيبيها لمدة ربع ساعة أو لغاية ما تلاقي الخضار استوي، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون.





***************




سلطة الزبادي






المقادير:



3 فصوص ثوم مدقوق

علبة زبادي
ورقة نعناع جافّ أو أخضر
خيارة مقطعة قطع صغيرة جداً أو مفرومة
معلقة زيت ذرة
معلقة فلفل أسود
معلقة ملح

معلقة كمون


الطريقة:





حطي علبة الزبادي فى طبق السلطة، وضيفي إليها الثوم المدقوق والخيار والملح والزيت والفلفل الأسود والكمون، وقلبيهم كلهم مع بعضهم كويس، وزيني أطراف الطبق بالنعناع أو رشي على الطبق أوراق النعناع.





***************



بط محشي فريك






البط من الأطباق المشهورة جداً في المطبخ المصري واللي كل المصريين بيحرصوا على وجوده على مائدة الإفطار في أول يوم رمضان، وفيه أكتر من طريقة لعمل البط بس إحنا النهارده اخترنا لك الطريقة دي...





المقادير:



1/2 كيلو فريك

1 حبة طماطم مقطعة قطع صغيرة جداً
2 معلقة كبيرة زبدة
3 معالق كبيرة زيت عباد الشمس
3 بصلات مقطعة قطع صغيرة
3 حبات بطاطس مقطعة قطع صغيرة
ملح وفلفل وبهارات
3 بصلات مقطعة شرائح
ورق لاورا
3 أكواب مية دافية
كوب كبير دقيق

عصير ليمونة


الطريقة:



1- هاتي الفريك واغسليه كويس وبعد كده حطيه في المصفاة.





2- هاتي حلة وحطي فيها الزبدة والزيت وحطيهم على النار لغاية ما يسخنوا، وبعد كده ضيفي إليهم الفريك مع التقليب المستمر لغاية ما الفريك لونه يبقى ذهبي.





3- لما تلاقي إن الفريك لونه بقى ذهبي ضيفي إليه الطماطم المبشورة والبصل والبطاطس والملح والفلفل والبهارات، وشوحيهم على النار لمدة 10 دقائق مع التقليب المستمر بس خدي بالك إن النار تكون هادية.





4- هاتي البطة ونظفيها كويس من جوه ومن بره واغسليها بالمية وبالملح والدقيق والليمون وبعد كده اغسليها بالمية وبعدين حطيها في المصفاة علشان تصفي كل المية اللي فيها.





5- بعد كده هاتي شوكة واغرسيها في جسم البطة في أماكن مختلفة بعد كده ادهني قلب البطة بالملح والفلفل وابدئي في حشو قلبها بخلطة الفريك.





6- هاتي صينية الفرن وادهنيها سمنة وحطي فيها شرائح البصل المتبل بالملح والفلفل وورق اللاورا، وحطي عليهم البطة ورشي الملح والفلفل والبهارات على سطح البطة.





7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة.





8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص.





9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر.





10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس.





***************




كنافة بالمكسرات





المقادير:



1/2 كيلو كنافة

1/4 كوب زيت ذرة
1/2 كوب زبدة أو سمنة
1/4 كوب عين جمل أو جوز مقشر
1/4 كوب لوز مقشر
1/4 كوب بندق مقشر
1/4 كوب فستق مقشر

كوب زبيب


مقادير الشربات:



1/2 كوب سكر

3/4 كوب مية
عصير ليمون

فانيليا


طريقة عمل الشربات:



حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.





طريقة عمل الكنافة:



1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.





2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها.





3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.





4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.





5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق.






***************





وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار،





واستنينا بكرة في عزومة جديدة،









وإلى اللقاء غدا إن شاء الله





مع أطيب التمنيات بصوم مقبول وإفطار شهي بإذن الله





سلااااااااام

رد مع اقتباس
 
 رقم المشاركة : ( 3 )
~¤©§][روعــــة][§©¤~
رقم العضوية : 4
تاريخ التسجيل : Nov 2008
مكان الإقامة :
عدد المشاركات : 15,402
عدد النقاط : 100

روعــــة غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-12-2010 ]


عن جد غاليتي ندوووش دائماً تتحفينا بكل جديد
وصفات شهية جداً ولذيذة وخصوصاً البط محشي فريك صرلي فترة عمحاول احصل عن طريقة التحضير
وباذن الله رح جربها وادعيلك بس على طمانتك الوصفة مجربة من قبلك ؟؟؟
ورح تابع الوصفات كل يوم بيومه
تسلم يداك على ماتقدمه من روائع الله يعطيك الف عافية على المجهود شكراً لك
موضوع يستحق التثبيت

رد مع اقتباس
 
 رقم المشاركة : ( 4 )
ندى على
مراقبة
رقم العضوية : 95
تاريخ التسجيل : Dec 2008
مكان الإقامة :
عدد المشاركات : 1,262
عدد النقاط : 100

ندى على غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-14-2010 ]


تسلميلى أغلى الروعات

جربى الوصفة وباذن الله تعجبك حبيبتى

بجد مش عارفة اقولك ايه على ذوقك

وشكرا على التثبيت حبيبتى


بعتذر عن التأخير فى اضافة باقى المشاركات

بس النت عندى كان سىء جدا

ويسعدنى انك تتابعى معايا حبيبتى

كل العمر وانتى طيبة وبخير

رد مع اقتباس
 
 رقم المشاركة : ( 5 )
ندى على
مراقبة
رقم العضوية : 95
تاريخ التسجيل : Dec 2008
مكان الإقامة :
عدد المشاركات : 1,262
عدد النقاط : 100

ندى على غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-14-2010 ]


عزومة 2 رمضان








شوربة المشروم



المقادير:

بصلة مقطعة قطع صغيرة
3 معالق دقيق
3 معالق زبدة
ربع كيلو مشروم
كوب كريمة
ملح وفلفل
5 أكواب شوربة فراخ
أوراق بقدونس للتزيين

الطريقة:

1- أول حاجة هعملها إني هقطع المشروم لقطع صغيرة.



2- وبعد كده هجيب حلة واحط فيها شوية زبدة واشوح فيها المشروم لمدة عشر دقائق، وطبعا هضيف عليه الملح والفلفل.



3- بعد كده هاخد حوالي كوب واحد من الشوربة واحطها على المشروم واخليه على النار لمدة عشر دقائق؛ علشان يستوي، وبعد كده هطفي البوتجاز واسيب المشروم لغاية ما يبرد.. وبعد ما يبرد هضربه في الخلاط.



4- هحط شوية زبدة في طاسة، وهضيف إليها البصل وهشوح البصل على النار لمدة ربع ساعة.



5- بعد كده هضيف إليها الدقيق مع التقليب المستمر لغاية ما لون الدقيق يبقى ذهبي، وبعد كده هحط كوب شوربة بالتدريج مع التقليب المستمر علشان الدقيق ما يكلكعش وبعد كده هضيف ملح وفلفل.



6- هجيب المشروم اللي ضربته في الخلاط وهحطه في حلة على النار وأضيف عليها كوب الكريمة، واسيبهم يغلوا كلهم مع بعض... وبعد كده هحط باقي الشوربة.



7- وبعد كده هحط الشوربة في طبق الشوربة، وممكن أزين الطبق ببعض أوراق البقدونس... وبالهنا والشفا.





سلطة السيزر


فى ناس كتير بتروح محلات مخصوص علشان تاكل سلطة السيزر، بالرغم من إنك لو عملتيها في البيت مش هتاخد منك وقت خالص، وكمان مش هتكلّفك كتير؛ لأن مكوناتها بسيطة جداً...



المقادير:

خس كابوتشا
عصير ليمونة
معلقة مستردة
ملح وفلفل
زيت زيتون
زيت ذرة أو زيت عباد الشمس
قطعتين أنشوجة
شريحة توست محمص
بيضة مسلوقة
جبنة بارميزان
4/1 كوب كريمة


الطريقة:


1- أول حاجة هقطع الخس في طبق وعلى فكرة هقطع الخس بإيدي علشان أحافظ على الفيتامينات اللي فيه.



2- بعد كده هعمل الصوص الخاص بالسلطة وهو عبارة عن "خل + زيت ذرة أو زيت عباد الشمس + زيت زيتون + معلقة مستردة + عصير الليمون + الملح + جبنة بارميزان" وهضربهم مع بعض في الخلاط.. وبعد كده هضيف عليهم ربع كوب كريمة وهضربهم مع بعض مرة كمان.



3- بعد كده نحط الصوص المضروب في الخلاط على الخس المتقطع وفي الآخر نحط عليهم شرائح الأنشوجة والبيض المسلوق وعيش التوست المحمص... وبالهنا وشفا.




فطيرة السبانخ


الطبق الجانبي اللي هعمله النهارده هو عبارة عن "فطيرة السبانخ" ودي هعملها مخصوص علشان الناس اللي مش بتحب السبانخ علشان أخليهم يحبوها؛ لأن الطبق ده طعمه حلو أوي ومليان فيتامينات الجسم محتاج لها..



المقادير:

كيلو سبانخ مسلوقة
رقائق هشة من أي سوبر ماركت
معلقتين صنوبر
جبنة رومي مبشورة
5 فصوص ثوم مدقوق
2/1 كوب كريمة
2 بيض
ملح وفلفل
زبدة


الطريقة:


1- هجيب الصينية واحط فيها معلقة زبدة.. وبعد كده هجيب العجينة وأفردها بنشابة، وهحطها بحجم الصينية وأبططها.



2- هفرد العجينة في الصينية.



3- هجيب طاسة وهحط فيها معلقة زبدة واحطها على النار.



4- بعد ما الزبدة تسيح هضيف إليها السبانخ، وأقلبها كويس، وبعد كده هضيف إليها الملح والفلفل والبهارات والثوم مع التقليب المستمر.



5- هجيب طبق واسع واكسّر فيه 2 بيضة مضاف إليهم رشة ملح وفلفل، وأضربهم بالمضرب واضيف إليهم نص كوب كريمة (وأقلبهم بالراحة).. وبعد كده أضيف إليهم الجبنة المبشورة وشوية ملح وبهارات.



6- هجيب السبانخ وهضيفها للخليط السابق واقلبهم كلهم مع بعض كويس.



7- هجيب الصينية اللي فيها الفطيرة وهحط عليها السبانخ بالتساوي وفي النهاية أرش الصنوبر من على الوش وأدخلها الفرن لمدة نص ساعة.. وبالهنا وشفا.




شرائح الفليه الكندوز بزبدة الفول السوداني

الطبق الرئيسي اللي معانا النهارده هو "شرائح الفليه الكندوز بزبدة الفول السوداني" وعلى فكرة الطبق ده مش هياخد في تحضيره أكتر من عشر دقائق بس..



المقادير:

كيلو شرائح فليه كندوز
4 معالق زبدة فول سوداني
كوب كريمة
كوب بصل مقطع لقطع صغيرة
ملح وفلفل


الطريقة:




1- أول حاجة هتبل اللحمة بشوية ملح وفلفل وهسيبهم مع بعض لمدة نص ساعة علشان اللحمة تتبل كويس، وعلى فكرة اللحمة الكندوز بتستوي بسرعة.. بعد مرور النص ساعة هجيب حلة وهحط فيها الزيت والبصل، وهشوّح البصل لمدة عشر دقائق على النار.. وبعد كده هحط اللحمة على البصل واشوحهم مع بعض على نار عالية.



2- هجيب طاسة صغيرة هحط فيها زبدة الفول السوداني وشوية مية وهقلبهم مع بعض، وهضيف إليهم الملح والفلفل وفي نفس الوقت أكون بقلّب اللحمة.



3- بعد كده هحط زبدة الفول السوداني على اللحمة وبعد شوية كمان هضيف إليهم كوب الكريمة واسيبهم يغلوا ويستوا مع بعض.



4- في النهاية بجيب طبق التقديم وباحط فيه أرز بشعرية وشرائح الفليه الكندوز بزبدة الفول السوداني والكريمة.. وبالهنا والشفا.







قراصية باللوز والسكر والكريمة


النهارده طبق الحلو سهل جداً وبسيط، وممكن أي حد يعمله وهو طبق القراصية باللوز والسكر والكريمة.



المقادير:

نص كيلو قراصية (طازة وجديدة وطرية علشان ما تاخدش وقت وأنا باطلع البذر منها)
لوز مسلوق ومقشر
2/1 كوب سكر
لوز متقطع ومحمص
كريم شانتيه


الطريقة:



1- أول حاجة هاعمل الكريم شانتيه، وكل اللي هنحتاجه 2 كوب كريم شانتيه جاهز من السوبر ماركت ونضربهم مع 2 كوب لبن ساقع.



2- بعد كده أجيب 2 كوب ماء مغلي أحط فيه اللوز لمدة دقيقتين ولما يبرد شوية أقشره بسهولة وبعدها أحشي القراصية باللوز ده.



3- هجيب طاسة وهحط فيها السكر واحطها على النار لغاية لما السكر يسيح، وأول ما السكر يدوب أوطي النار لحد ما أحس إن عندي صوص خفيف من السكر.



4- بعد كده هحط عليه القراصية المحشية وأقلبهم مع بعض.



5- هجيب طبق الحلو وهحط فيه اللوز المحمص بطريقة عشوائية وبعد كده هحط القراصية المحشية اللي حطينا عليها السكر.



6- هغطي كل القراصية بالكريم شانتيه ومن على الوش هحط اللوز المحمص.. وبالهنا وشفا.





وبكده تكوني جهزتي لأسرتك وجبة فطار لذيدة وسهلة..

وأشوفكم على خير بكرا باذن الله

مع وجبة جديدة ولذيذة،،،

رد مع اقتباس
 
 رقم المشاركة : ( 6 )
ندى على
مراقبة
رقم العضوية : 95
تاريخ التسجيل : Dec 2008
مكان الإقامة :
عدد المشاركات : 1,262
عدد النقاط : 100

ندى على غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-14-2010 ]


عزومة 3 رمضان



البلح باللبن





فيه ناس كتير بيحبوا إنهم يفطروا على البلح باللبن، علشان كده جبنا لهم النهارده أحسن طريقة لعمل البلح باللبن وعلى فكرة كوب البلح باللبن ده مفيد جداً جداً للجسم.

المقادير:

كيلو لبن
5 معالق سكر "اختياري"
1/4 كيلو بلح منزوع النوى
1/2 معلقة فانيليا أو نص معلقة قرفة "اختياري"

الطريقة:

1- انقعي البلح لمدة خمس ساعات في مية.

2- هاتي اللبن البارد وضيفي ليه البلح والسكر وقلبيهم مع بعض كويس، وبعد كده ضيفي إليهم نصف معلقة الفانيليا أو نصف معلقة قرفة، وقلبيهم كلهم مع بعضهم كويس وبعد كده صبيهم في الكوبايات.





***************







شوربة البسلة





المقادير:

كوب لبن
كوب شوربة فراخ أو لحمة
بصلة متوسطة مقطعة قطعاً صغيرة جداً
1/4 كيلو بسلة
3 أكواب مية
1/2 1 معلقة كبيرة زبدة
معلقة كبيرة دقيق
1/4 حزمة بقدونس مقطعة قطع صغيرة

الطريقة:

1- هاتي البسلة واسلقيها كويس في المية لمدة ربع ساعة بعد ما تلاقيها استوت اطفي البوتجاز وصفيها من مية السلق وسيبيها لغاية ما تبرد.

2- حطي البسلة في الخلاط وضيفي إليها ربع كوب مية واضربيها في الخلاط كويس علشان تنعم، وبعد كده صفيها بمصفاة دقيقة.

3- هاتي حلة وحطي فيها الزبدة وبعد كده ضيفي إليها البصلة وقلبيها كويس لغاية ما لونها يبقي ذهبي.. بعد ما تلاقي إن لون البصلة بقى ذهبي ضيفي إليها الدقيق وباقي الزبدة، واستمري في التقليب لغاية ما الدقيق يبقى لونه ذهبي.

4- بعد كده ضيفي اللبن على الدقيق بالتدريج مع التقليب المستمر، وبعد كده ضيفي ليه المرقة والملح والفلفل والبسلة وقلبيهم كويس مع بعض، وسيبيهم مع بعض لغاية ما يغلوا وبكده إنت عملتي شوربة البسلة وقبل أذان المغرب بربع ساعة سخنيها تاني وصبيها في أطباق الشوربة.



***************


سلطة البطاطس





المقادير:

4 ثمرات بطاطس مسلوقة ومقطعة مكعبات
1/2 حزمة بقدونس مقطعة قطعاً صغيرة
1/4 حزمة كرفس مقطعة قطع صغيرة
بصلة مقطعة قطع صغيرة
فصين ثوم مدقوقين ناعم
معلقة صغيرة فلفل
معلقة صغيرة ملح
ثمرة طماطم مقطعة قطع صغيرة
قرن فلفل أحمر مقطع قطع صغيرة

الطريقة:


اخلطي كل المقادير مع بعضها وحطيها في طبق السلطة.



***************


الريش البتلو بالخضراوات




المقادير:

كيلو ريش بتلو أو ضاني
بصلة كبيرة مقطعة شرائح
ثمرة فلفل أخضر صغيرة مقطعة قطع صغيرة
2 معلقة كبيرة عصير ليمون
1/2 كوب بسلة
3 ثمرات جزر
3 ثمرات بطاطس
حزمة روزماري
معلقة كبيرة بهارات
1/2 كوب مية مغلية

الطريقة:


1- قطّعي أوراق الروزماري، واخلطيها بالفلفل الأخضر وعصير الليمون والملح والفلفل وقلبيهم مع بعض كويس وضيفي إليهم الريش وقلبيهم كلهم مع بعض وسيبيهم لمدة 3 ساعات علشان اللحمة تتبل كويس.

2- بعد مرور الـ 3 ساعات هاتي صينية الفرن وحطي فيها شرائح البصل ورصي من فوقها الريش، وضيفي ليهم باقي الخليط السابق اللي إنت عملتيه.

3- حطي الصينية على نار متوسطة، وسيبيها لغاية ما اللحمة تخرّج المية الموجودة فيها وتشربها تاني مع التقليب من وقت للتاني.

4- لما تلاقي اللحمة شربت المية بتاعتها ضيفي ليها المية مغلية وغطي الصينية وسيبيها على النار لمدة ساعة ونص كمان أو لغاية ما تلاقي إن اللحمة استوت.

5- بعد مرور ساعة من وجود اللحمة على النار اسلقي البسلة وقطّعي الجزر والبطاطس لقطع كبيرة، وضيفيهم إلى اللحمة بعد ساعة من مدة طهي اللحمة سيبيهم على النار لغاية ما الاتنين يستووا.

6- بعد ما اللحمة والخضار يستووا اغرفيهم في أطباق التقديم، ممكن مع الطبق ده تعملي طبق رز أبيض أو طبق مكرونة.



***************

قطايف بالمكسرات




المقادير:

1/2 كيلو قطايف عصافيري "صغيرة"
كوب بندق مجروش
كوب لوز مجروش
كوب سوداني مجروش
1/2 كوب سكر
معلقة كبيرة ماء زهر أو ماء ورد
زيت للقلي
شربات

مقادير الشربات:

1/2 كوب سكر
3/4 كوب مية
عصير ليمونة
فانيليا

الطريقة:

1- هاتي طبق واخلطي فيه البندق واللوز والسكر، وضيفي ليهم ماء الزهر أو الورد.

2- هاتي القطايف واحشيها معلقة كبيرة من خليط المكسرات اللي عندك، خدي بالك إن الحشو ده يكون في وسط قرص القطايف، واقفلي قرص القطايف بالضغط عليه بإيدك، وخدي بالك إنك تتأكدي من عدم وجود أي حشو ظاهر.

3- بعد ما تخلصي حشو القطايف كلها هاتي طاسة وسخني فيها الزيت كويس، وبعد كده اقلي القطايف على درجة حرارة متوسطة، لغاية ما تلاقي إن لون القطايف بقى ذهبي شيليها من الزيت وحطيها في الشربات، وبعد كده طلعيها من الشربات وحطيها في مصفاة علشان تتخلصي من الشربات الزيادة، وبعد كده حطيها في طبق الحلويات.

طريقة عمل الشربات:


حطي السكر والمية كلهم مع بعض في إناء على نار هادئة لمدة ربع ساعة، وبعد كده ضيفي الليمون وسيبيه لمدة 5 دقائق لغاية ما يغلي، وحطي الفانيليا وشيليه من على النار وسيبيه لغاية ما يبرد.


***************


وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار،
واستنينا بكرة في عزومة جديدة،





وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام



*********************

رد مع اقتباس
 
 رقم المشاركة : ( 7 )
samir_sat
رقم العضوية : 383
تاريخ التسجيل : Mar 2009
مكان الإقامة : LOS ANGELES
عدد المشاركات : 962
عدد النقاط : 100

samir_sat غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-14-2010 ]


اخت ندى موضوع يستحق الشكرالكبيرلكن المشكلة إنه عندما شاهدت كل الاكلات الشهية وانا صائم لم استطع المتابعة ...


رد مع اقتباس
 
 رقم المشاركة : ( 8 )
ندى على
مراقبة
رقم العضوية : 95
تاريخ التسجيل : Dec 2008
مكان الإقامة :
عدد المشاركات : 1,262
عدد النقاط : 100

ندى على غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-16-2010 ]


اقتباس:
المشاركة الأصلية كتبت بواسطة samir_sat مشاهدة المشاركة
اخت ندى موضوع يستحق الشكرالكبيرلكن المشكلة إنه عندما شاهدت كل الاكلات الشهية وانا صائم لم استطع المتابعة ...
ربنا يخليك سمير

دوما ما يحرجنى ردك المجامل

كل رمضان وانت طيب

وكل العمر وانت بسعادة

رد مع اقتباس
 
 رقم المشاركة : ( 9 )
samir_sat
رقم العضوية : 383
تاريخ التسجيل : Mar 2009
مكان الإقامة : LOS ANGELES
عدد المشاركات : 962
عدد النقاط : 100

samir_sat غير متواجد حالياً

رد: عزومات رمضان ..كل يوم عزومة تابعونا

كُتب : [ 08-17-2010 ]


اقتباس:
المشاركة الأصلية كتبت بواسطة ندى على مشاهدة المشاركة
ربنا يخليك سمير

دوما ما يحرجنى ردك المجامل

كل رمضان وانت طيب

وكل العمر وانت بسعادة
وانت كمان اخت ندى الله يديمك يا رب

رد مع اقتباس
 
 رقم المشاركة : ( 10 )
ندى على
مراقبة
رقم العضوية : 95
تاريخ التسجيل : Dec 2008
مكان الإقامة :
عدد المشاركات : 1,262
عدد النقاط : 100

ندى على غير متواجد حالياً

افتراضي رد: عزومات رمضان ..كل يوم عزومة تابعونا

كُتب : [ 08-20-2010 ]


عزومة 4 رمضان





عصير البرتقال والليمون





ده بقى عصير مفيد جداً؛ لأنه مليان فيتامينات مفيدة للجسم، وكمان بيساعد على الهضم.

المقادير:

1/4 كيلو برتقال
1/2 كوب سكر
عصير ليمونة
مكعبات ثلج "اختياري"

الطريقة:


اعصري البرتقال، وضيفي إليه عصير الليمون والسكر وقلبيهم مع بعض كويس، وبعد كده دخّليه الثلاجة، وقبل أذان المغرب بربع ساعة خرجيه وصبيه في كاسات العصير وضيفي ليه مكعبات الثلج.



***************





سلطة الطحينة الحارة







المقادير:

كوب طحينة
4 فصوص ثوم
1/2 كوب لبن
عصير ليمونة
قرن فلفل أحمر حار
2 معلقة كبيرة زيت ذرة
ملح وفلفل
1/2 فنجان مية دافية
1/2 معلقة كمون مطحون
أوراق بقدونس "للتزيين"
حمص "للتزيين"

الطريقة:


1- اطحني الثوم مع الفلفل الأحمر، ومعاهم الملح والفلفل كويس لغاية ما تلاقيهم بقوا ناعمين قوي، بعد كده هاتي طبق السلطة، وحطي فيه الطحينة، وضيفي عليها باقي المكونات دي ما عدا الزيت وابدئي في خلطهم كلهم مع بعض كويس.

2- بعد ما تتأكدي إن الخليط بقى ناعم، ضيفي الزيت والكمون المطحون وأوراق البقدونس والحمص للتزيين.



***************





شوربة الخضار والفراخ والمشروم





المقادير:

1/4 كيلو صدور فراخ مقطعة قطع كبيرة ومسلوقة
3 بصلات مقطعة قطع صغيرة جداً
كوب لبن
3 أكواب شوربة فراخ
كوب دقيق
1/4 كيلو مشروم مقطع شرائح
3 معالق كبيرة زبدة
عصير ليمونة
1/2 حزمة بقدونس مقطعة قطعاً صغيرة
ملح وفلفل
3 أكواب خضار مشكل ومقطع مكعبات صغيرة (جزر - بسلة - بطاطس)

الطريقة:


1- سيّحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي.

2- لما تلاقي إن لون البصلة بقى ذهبي ضيفي إليها الدقيق، مع استمرار التقليب لمدة خمس دقائق أو لغاية ما الدقيق يحمرّ.

3- بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش.

4- بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسميكة ومش مكلكعة ضيفي إليها الخضار والمشروم.

5- سيبي الخليط علي النار لمدة ربع ساعة، وبعد كده ضيفي إليه عصير الليمون والبهارات والملح وسيبه على النار لمدة ربع ساعة كمان، وبعد كده اطفي البوتجاز وحطي الشوربة في أطباق التقديم وزيني الأطباق بالبقدونس.



***************





فراخ على الطريقة اللبنانية







المقادير:

فرخة متوسطة الحجم
ثمرة طماطم مبشورة
2 بصلة مبشورة
5 فصوص ثوم مدقوق
2 ليمونة مبشورة بالقشر
فلفل رومي مبشور
حزمة بقدونس مقطعة قطع صغيرة جداً
ملح وفلفل أسود وبهارات
1/4 كوب زيت ذرة

الطريقة:


1- هاتي الفرخة، واغسليها كويس، وبعد كده اخلطي كل المقادير الباقية مع بعض، واحشي بيهم قلب الفرخة، وبين الجلد واللحم، ورشي عليها من برة الزيت وسيبها لمدة ساعتين علشان تتبل.

2- بعد مرور الساعتين هاتي صينية فرن وحطي فيها الفرخة ودخليها الفرن لمدة ساعة ونص، أو لغاية ما تستوي وتحمر.

3- بعد كده خرجيها وحطيها في أطباق التقديم، وعلى فكرة ممكن مع الطبق ده تعملي طبق مكرونة بيضاء وتاخدي الصوص بتاع الفرخة تحطيه على المكرونة.



***************





كنافة بالقشطة







المقادير:

1/2 كيلو كنافة
كوب سمن

مقادير القشطة:

3 أكواب لبن
5 معالق كبيرة دقيق
كوب قشطة

مقادير الشربات:

1/2 كوب سكر
3/4 كوب ماء
عصير ليمونة
فانيليا

طريقة عمل الكنافة:


1- هاتي الكنافة وقطعيها كويس وبعد كده افركيها بالسمنة، بعد كده هاتي صينية وادهنيها بالسمنة، وبعد كده حطي نصف مقدار الكنافة في الصينية مع الضغط عليها كويس بإيدك أو باستخدام صينية أخرى، وده علشان الكنافة ما تكونش هايشة في الصينية، بعد كده رشي شوية سمنة فوقها وشوية قشطة من اللي إنتِ عاملاها، بس خدي بالك إنك تبعدي عن الأطراف.

2- بعد كده ضيفي النصف الباقي من الكنافة واضغطي عليها زي المرة اللي فاتت، ورشي فوقها شوية سمنة علشان الوش يحمر، وبعد كده دخليها الفرن على نار هادية.. بعد ما تلاقيها استوت خرجيها من الفرن، ورشي عليها الشربات اللي إنتِ عملتيه، وسيبيها لغاية ما تبرد، وبعد كده قطعيها وقدميها.

طريقة عمل الشربات:


حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، وبعد كده ضيفي الفانيليا وشيلي الشربات من على النار وسيبيه لغاية ما يبرد.


طريقة تحضير القشطة:


دوّبي اللبن والدقيق مع بعض، بعد كده حطيهم في إناء على النار وقلبيهم كويس لغاية ما تلاقي الخليط بدأ يتماسك، بعد كده شيليه من على النار، وضيفي ليه القشطة وقلبيهم كويس مع بعض لغاية ما تلاقي الخليط بدأ يتجانس، وبكده تبقى القشطة جاهزة.




***************



وبكده تكون خلصت عزومتنا النهارده وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام

رد مع اقتباس
إضافة رد

مواقع النشر


يتصفح الموضوع حالياً : 1 (0 عضو و 1 زائر)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى الردود آخر مشاركة
اسطوانه [أجمل رمضان في حياتي] (هدية رمضان لكل مسلم)‎ abdulraof منتدى شهر رمضان المبارك 5 08-12-2010 02:28 PM
أحاديث رمضان 1430 وأحاديث رمضان 1431هـ للدكتور محمد راتب النابلسي abdulraof البرامج والاغاني الاسلامية والفلاشات 4 08-10-2010 11:59 PM
فضل شهر رمضان samir_sat منتدى شهر رمضان المبارك 2 08-01-2010 05:45 PM
رمضان قادم فهل أنت راضي عن رمضان الفائت!؟؟ سلمى منتدى شهر رمضان المبارك 8 07-26-2010 08:54 AM
ما أجمل هذا الشعر عن رمضان استقبال رمضان.....شعرا الخنساء المنتدى الإسلامي 2 07-26-2009 01:50 PM


الساعة الآن 01:02 AM.


http://adf.ly/4855208/